ЭЛЧИН САЙД Д.БАТЖАРГАЛ ЯПОН УЛСЫН ПАРЛАМЕНТЫН ЗӨВЛӨХҮҮДИЙН ТАНХИМЫН ДАРГА А.САНТОД БАРААЛХАВ

Монгол Улсаас Япон Улсад суугаа Онц бөгөөд Бүрэн эрхт Элчин сайд Д.Батжаргал энэ сарын 28-ны өдөр Япон Улсын Парламентын Зөвлөхүүдийн танхимын дарга А.Сантод бараалхаж, хоёр улсын Стратегийн түншлэлийн харилцаа тэр дундаа парламент хоорондын харилцаа, хамтын ажиллагааг өргөжүүлэн хөгжүүлэхэд үнэтэй хувь нэмэр оруулж буйд талархал илэрхийлэв. Элчин сайдын зүгээс Монгол Улсын “гуравдагч хөрш”, нийтлэг үнэт зүйлс бүхий стратегийн дотно түнш Япон Улстай найрсаг харилцаа, хамтын ажиллагааг гүнзгийрүүлэн хөгжүүлэх нь манай гадаад бодлогын тэргүүлэх чиглэлийн нэг гэдгийг нотлов. Түүнчлэн Монгол Улсад ардчиллыг бэхжүүлэх, зах зээлийн эдийн засгийн тогтолцоог бүрдүүлэхэд Япон Улсын Засгийн газар, ард түмэн сэтгэл харамгүй дэмжлэг, туслалцаа үзүүлж ирсэнд гүнээ талархаж байдгаа илэрхийлэв. А.Санто даргын зүгээс энэ оны 7 дугаар сард Япон Улсын Парламентын Зөвлөхүүдийн танхимын сонгууль болж байгааг дурдаад хоёр улсын харилцааг өргөжүүлэн хөгжүүлэхэд цаашид ч хамтран ажиллах болно гэдгээ илэрхийлэв.

Японы бага, дунд сургуулийн сурагчдын дунд “Миний мэдэх Монгол орон” гар зургийн уралдааныг зохион байгуулав

Монгол Улс, Япон Улсын хооронд дипломат харилцаа тогтоосны 50 жилийн ойн хүрээнд Монгол Улсаас Япон Улсад суугаа Элчин сайдын яамнаас зохион байгуулах арга хэмжээний төлөвлөгөөний хүрээнд Японы бага, дунд сургуулийн сурагчдын дунд “Миний мэдэх Монгол орон” гар зургийн уралдааныг зохион байгуулж, уг уралдаанд Токио, Фүкүока, Гүнма зэрэг муж, хотоос нийт 89 хүүхэд уран бүтээлээ ирүүлсэн юм. Тус уралдаанд шагналт байранд орсон уран бүтээлийн эздэд шагнал гардуулах ёслолын үйл ажиллагааг ЭСЯ-нд 2022 оны 6 дугаар сарын 20-ны өдөр зохион байгуулав. Арга хэмжээг нээж Монгол Улсаас Япон Улсад суугаа Элчин сайд Д.Батжаргал нээж хүүхдүүдэд баяр хүргэн, мэндчилгээ дэвшүүлэв.