ЭЭЛЖИТ ХАМТАРСАН ЗӨВЛӨГӨӨН ЗОХИОН БАЙГУУЛАВ

Монгол, Японы хөдөлмөрийн асуудал эрхэлсэн төр засгийн байгууллагуудын ээлжит цахим зөвлөгөөнийг 2025 оны 5 дугаар сарын 21-ний өдөр болж өнгөрөв. Уулзалтад монгол талаас Монгол Улсын Гэр бүл, Хөдөлмөр, Нийгмийн Хамгааллын яам, Хөдөлмөр, Халамж үйлчилгээний Ерөнхий газар, Монгол Улсаас Япон Улсад суугаа Элчин сайдын яам, япон талаас Япон Улсын Эрүүл мэнд, хөдөлмөрийн яам, Хууль зүйн яамны харьяа Хилийн шалган нэвтрэх, оршин суух хяналтын газар, Гадаад хэргийн яам, Ур чадварын дадлага тогтолцоог хэрэгжүүлэгч байгууллага (ОТИТ)-ын төлөөлөгчид оролцов.

Япон Улс 2026 оны 7 дугаар сараас эхлэн “Суралцагч ажилтан” хөтөлбөрийг хэрэгжүүлж эхлэхтэй холбогдуулан Монгол-Япон хоёр улсын хооронд “Суралцагч ажилтан илгээх, хүлээн авах тухай Санамж бичиг” байгуулахаар төлөвлөж байна.

Зөвлөгөөний үеэр Японы Ур чадварын дадлага тогтолцоог хэрэгжүүлэгч байгууллага (ОТИТ)-аас гадаад ажилтныг Япон Улсад ажиллуулахтай холбоотой “Суралцагч ажилтан” шинэ хөтөлбөрийн тухай танилцуулав.

Япон Улсад гадаад иргэдийн ажиллах боломжийг нэмэгдүүлэх “Суралцагч ажилтан” хөтөлбөр нь өнөөг хүртэл хэрэгжүүлж ирсэн хөтөлбөрүүдээс дэвшилттэй буюу гадаад иргэдийн амьдрах нөхцлийг сайжруулахтай холбоотой зарим агуулгыг тусгаж буйгаараа онцлог байна.

Мөн энэ үеэр талууд “Ур чадварын дадлагажигч” тогтолцооны хамтын ажиллагааны Санамж бичгийн хэрэгжилтийн өнөөгийн байдал болон иргэдээс ирж буй санал гомдол, тулгамдсан асуудлыг хэрхэн шийдвэрлэх талаар зөвлөлдөв.

Зөвлөгөөний үр дүнд Монгол Улсын Гэр бүл, Хөдөлмөр, Нийгмийн Хамгааллын яам, Хөдөлмөр, Халамж үйлчилгээний Ерөнхий газраас “Суралцагч ажилтан илгээх, хүлээн авах тухай Санамж бичиг”-ийн төсөлд холбогдох саналаа тусгахаар тохиролцов.